Астанада жыл сайын 30 мың бала дүниеге келеді
АСТАНА. ҚазАқпарат - Дәрігерлердің сапалық көрсеткішінде бірқатар мәселе бар. Бұл туралы бүгін қала халқының алдында есеп беріп жатқан Астана әкімі Бақыт Сұлтанов айтты, деп хабарлайды ҚазАқпарат тілшісі.
«Жаны саудың - тәні сау» дейді қазақ. Дәрігерлер - еңбегі көп елене бермейтін саланың өкілдері екенін білесіздер. Алайда, бір сәт ойланайықшы! Олар - күн сайын түрлі тағдырлармен бетпе-бет келетін қайсар жандар емес пе? Өмір мен өлімнің арасында жанталасып жатқан науқасты азабынан құтқаратын қаһармандар - міне, осылар ғой. Рас, медицина саласында, әсіресе, қалалық емханаларда кадр тапшылығы, қызметкерлердің сапалық көрсеткіші бойынша бірқатар мәселелер бар. Бірақ, біз осы проблемаларды жеңу үшін бірқатар қадамдар жасадық», - деді қала басшысы.
Осы орайда, ол емхана дәрігерлерінің кәсібилігін көтеру және азаматтармен қарым-қатынас шеберлігін нығайтуға бағытталған семинарлар өткізіліп жатқандығын айтты. Сонымен қатар медицина саласында өлім-жітім көрсеткішін төмендету, тиімді емдеу үшін инфрақұрылым құру, кадрларға әлеуметтік пакет беру және қажетті құрал-жабдықтармен қамтамасыз етуге басымдық берілетіндігін атап өтті.
«Елордада өлім-жітім көп болатын аурулардың көрсеткіштерін айтарлықтай жақсарта алдық. Атап айтқанда қан айналымы жүйесінен болатын өлім жітім -18, инфарктан -9, гипертониядан -8 пайыз төмендеді. Бұл цифрлардың артында ондаған мың құтқарылған өмір тұр. Орташа алғанда өлім-жітім 10 пайыздан астамға төмендеді. Жыл сайын елордада 30 мың бала дүниеге келеді», - деді ол.
