Астанада жылдың соңына дейін тағы 5 қолжетімді тұрғын үй пайдалануға беріледі - әкім орынбасары С.Хорошун
АСТАНА. 22 қазан. ҚазАқпарат - Ағымдағы жылдың соңына дейін біз «Қолжетімді баспана - 2020» бағдарламасы аясында тағы 5 тұрғын үй кешенін пайдалануға беретін боламыз. Бұл туралы Министрлер кабинетінің бүгінгі отырысында Астана қаласы әкімінің бірінші орынбасары Сергей Хорошун мәлім етті.
Оның хабарлауынша, осы уақытқа дейін Астанада тұрғын үй құрылыс жинақ жүйесі бойынша 420 пәтерлі бір көппәтерлі үй пайдалануға берілді. Оған қоса, жалпы 1633 пәтері бар 8 тұрғын үйдің құрылысы атқарылып жатыр. «Ағымдағы жылдың аяғына дейін біз тағы 5 үйді пайдалануға беруді көздеп отырмыз. Мемлекеттік комиссия екі нысанның актісін осы айда рәсімдесе, келесі айда - бір, ал желтоқсанда тағы екі тұрғын үйдің құжаттарына қол қойылады», - дейді С.Хорошун.
Әкім орынбасары атап көрсеткендей, Астанада пайдалануға берілетін баспана көлемінің азаюы тұрғын үй кешендерінің бәрін толыққанды дайын күйінде қабылдау талаптарын енгізумен тығыз байланысты.
