Астана әуежайында ұшақтардың кеш келуіне байланысты 3 рейстің уақыты ауысты

Елорда әуежайының әуе айлағында жағдай тұрақты. Тек ұшақтың кеш келуіне байланысты 3 рейстің уақыты өзгерді. Бұл туралы Астана халықаралық әуежайының баспасөз қызметі мәлімдеді, деп хабарлайды Kazinform.

«Астанада күн райы тұрақталып, ұшуға қолайлы болып тұр. Бүгін ауа райына байланысты рейстер тоқтатылған жоқ. Қазір әуе айлақта желдің жылдамдығы – 6 м/с, ауа температурасы – 18°C. Бүгін елорда әуежайында ұшуға 74 рейс жоспарланған болатын. Оның 3-еуі ұшақтың кеш келуіне байланысты кешіктірілуде», - деп жазды баспасөз қызметі.

Айта кетейік, кеше Астанада қолайсыз ауа райына байланысты кейбір рейстер кестесі өзгерген еді. Әуе айлақ қызметі 14:00-20:00 аралығында желдің жылдамдығы 22 м/с-дан 27 м/с дейін жетуі мүмкіндігі туралы хабарлама алды.

Кеше елорда әуежайында 75 рейс жоспарланған болатын. Оның 12 рейсі (4 ұшатын, 8 ұшып келетін) ұшақтың кеш келуіне байланысты кешікті. Елордадағы қолайсыз ауа райына байланысты IQ389 Астана-Жезқазған бағытында ұшатын рейс тоқтатылды.