Астанадағы қоғамдық көлік паркі жаңа 320 автобуспен толығады
АСТАНА. KAZINFORM – Елорданың әкімі Жеңіс Қасымбек Instagram парақшасында қоғамдық көлік саны артатыны туралы жазды, деп хабарлайды елорда әкімдігінің ресми сайты.
«Биыл елорданың қоғамдық көлік паркі 320 автобуспен толығады. Олардың басым бөлігі қазірдің өзінде желіге шықты. Мәселен, бірер күн бұрын елордаға жаңа 55 автобус жеткізілді. Оның 26-сы толық жабдықталып, маршрутқа шықты. Қалған бөлігі техникалық дайындықтан өткеннен кейін желіге шығады», - деп жазды Астана әкімі.
Өңір басшысы жаңа қоғамдық көліктер жаңа бағыттағы маршруттарды ашуға, күту уақытын қысқартуға, ескі автобустарды кезең-кезеңімен ауыстыруға мүмкіндік беретінін атап өтті.
«Былтыр қоғамдық көлік паркін 400 автобусқа ұлғайтқанбыз. Жылжымалы құрамды жаңарту жұмысы жүріп жатыр», - деп жазды Жеңіс Қасымбек.
Еске сала кетейік, бұған дейін Астанада үстел теннисінен алғаш рет Азия чемпионаты өтетінін жазған едік.
