Астанадағы №54 мектеп-лицейіне ғалым А.Сейдімбектің есімі беріледі
АСТАНА. Қыркүйектің 11-і. ҚазАқпарат /Арман Асқаров/ - Жақын арада Астанадағы №54 мектеп-лицейге белгілі ғалым, этнограф-жазушы Ақселеу Сланұлы Сейдімбектің есімі беріледі. Бұл туралы бүгін ғалымның атындағы мұражайдың ашылу рәсімінде осы мектептің директоры Ұмсын Нұржігітқызы мәлім етті, деп хабарлайды ҚазАқпарат.
«Бүгінде елімізге белгілі ғалым, жазушы, Мемлекеттік сыйлықтың лауреаты Ақселеу Сланұлы Сейдімбектің есімін Астанадағы №54 мектеп-лицейге беру жөніндегі қалалық мәслихаттың шешімі бар. Енді, осыған байланысты арнайы қаулы шыққаннан кейін, біздің мектебімізге Ақселеу ағамыздың аты беріледі», - дейді Ұ.Нұржігітқызы. Мектеп директоры атап көрсеткендей, А.Сейдімбек атындағы мемориалдық мұражайдың ашылуы осы игі істің бір бастамасы ғана.
