Астанадағы аграрлық университетінің жатақханалары жоғары жылдамдықты интернетке қосылды

ҚазАТУ ректоры Ақылбек Күрішбаевтың айтуынша, студенттердің білім алуында заманауи технология басты рөл ойнауы қажет. Сондықтан білім ордасы  «Астанателеком» ҚТО-мен бірлесіп, осы жобаны орындап шықты.

«Астанателеком» ҚТО ҚазАТУ-дың төрт жатақханасы мен екі оқу корпусын жылдамдығы 50 Мбит/с-тық интернетке қосып берді. Сонымен қатар, iD TV және iD Phone қызметінің 500 нүктесі қосылды.

«Білім беру саласында инновациялық технологияларды енгізу жаңа мүмкіндіктер туғызып, отандық білім сапасын жақсартатынына сенімдімін», - деп атап өтті «Астанателеком» ҚТО бас директоры Ермек Қуанышбеков.

Қуанышбековтың сөзіне қарағанда, жобаның жалпы құны 49 млн теңгені құрайды, оның 50%-ын «Қазақтелеком», 50%-ын ҚазАТУ бөлген.

Айта кетейік, елімізде мұндай жоба тұңғыш рет «Астанателекомның» іске асыруымен Л. Гумилев атындағы Еуразия ұлттық университетінде 2010 жылы жасалған болатын.