Астанадағы ақылы тұрақтардан кім қанша табыс табады
АСТАНА. ҚазАқпарат – Астана қаласы көлік және жол-көлік инфрақұрылымын дамыту басқармасы елордада ақылы тұрақтар пайда болғаннан бері бюджетке қанша кіріс түскенін мәлім етті, деп хабарлайды ҚазАқпарат тілшісі.
«Мемлекет-жеке меншік әріптестігінің шарты жасалған сәттен бастап, яғни, 2018 жылғы қарашадан 2022 жылғы желтоқсанға дейін тараптар арасындағы табысты бөлу мемлекеттік әріптеске – 5%, жеке серіктеске – 95% мөлшерінде белгіленген», - деп жазылған басқарма мәліметінде.
Бұл ақылы тұрақтан түсетін табыстың 5%-ы бюджетке, 95%-ы «Астана тұрақ кеңістігі» ЖШС-не тиесілі деген сөз.
«Мемлекеттік бюджетке 5% түсім аясында 12 млн тенгеден астам табыс түсті», - деп жазылған әкімдік мәліметінде.
«Астана тұрақ кеңістігі» ЖШС-нің табыс үлесі 95% екенін ескерсек, 2018 жылдың қарашасынан бері компания 228 млн теңге табыс тапқан болып шығады.
Ал бюджетке ақылы тұрақ ақысына қарағанда айыппұлдардан түсетін кірістің мөлшері қомақты.
«МЖӘ шарты жасалғаннан бері қала бюджетіне айыппұлдан 2 млрд теңгеден астам кіріс түскен», - делінген әкімдік дерегінде.
