Астанадағы КО техникалық регламенті талаптарын бұзған салонға автокөлік сатуға тыйым салынды
АСТАНА. ҚазАқпарат - ҚР Инвестициялар және даму министрлігінің Астана қаласы бойынша Техникалық бақылау және метрология комитеті департаментінің жоспардан тыс тексеруі барысында «Медина-2008» ЖШС-де Кедендік одақтың «Дөңгелекті көлік құралдарының қауіпсіздігі туралы» техникалық регламентінің бұзылғаны анықталды, деп хабарлайды ведомствоның баспасөз қызметінен.
«Тексеріс барысында Астанадағы «Көрме» орталығында сауда алаңын жалға алып отырған «Медина-2008» ЖШС-інде 68,5 млн теңге сомасындағы Ресейде шығарылған «Lifan», «Renault», «Chevrolet» және тағы басқа маркалы көліктерді көлік құралдарының типін мақұлдау туралы құжаттарсыз сатылу фактісі анықталған», - делінген хабарламада.
Ведомствода көліктік құралдарды сәйкестендірілген құжаттарсыз айналымға шығару Кедендік одақтың 2015 жылдың 1 қаңтарынан бастап күшіне енген «Дөңгелекті көлік құралдарының қауіпсіздігі туралы» регламентін бұзу болып табылатынын еске салды. Тексеріс қорытындылары бойынша, ҚР «Әкімшілік құқық бұзушылықтар туралы» Кодексінің 415-бабына сәйкес «Медина» ЖШС-де көлік құралдарын сату тоқтатылды, заңды тұлға жауапкершілікке тартылатын болды», - делінген хабарламада.
