Астанадағы марафонға 5 мыңға жуық адам қатысады
АСТАНА. ҚазАқпарат - 2009 жылдан бері өткізіліп жатқан Астана марафоны биыл ең ауқымды шаралардың бірі болмақ. Шараға қатысушылар 10, 21,1 және 42,2 шақырым қашықтықтарға жүгіреді. Бұл туралы елорданың ресми сайты хабарлады.
Биыл марафонға үкімет мүшелері, елшіліктер мен халықаралық және республикалық компаниялардың қызметкерлері, сондай-ақ, таяу және қиыр шетелдің атлеттері қатысады.
Марафонға қатысу үшін astana42k.com ресми сайтында онлайн режимде немесе Кроссфит Астана клубтарында тіркелу керек. Жарна сомасы - 3-7 мың теңге шамасында.
Айта кетейік, қатысушылар бірнеше санат бойынша тіркеледі. Мысалы, құрамында кемінде 5 адам бар әуесқой және спорт клубтарына 20% жеңілдік жасалады.
Жиналған қаржы қайырымдылық қорларға аударылады. Жалпы алғанда, 2009 жылы марафон өткізудің нәтижесінде 24 млн теңгеден астам қаржы жиналды. Сондай-ақ, қаржының бір бөлігі ауыл жастарын спортпен шұғылдануға тартуға бағытталған OneSteppeBeyond қайырымдылық жобасын іске асыруға жұмсалады.
