Астанадағы сауда орталықтарында Наурыз мейрамына орай мерекелік шаралар өткізіледі

АСТАНА. ҚазАқпарат - Наурыз мейрамына орай елорданың сауда-ойын-сауық орталықтарында түрлі мәдени-бұқаралық шаралар ұйымдастырылады. Халықтық серуен екі күнге жалғасады, деп хабарлайды қала әкімдігінің сайты .

22 наурызда сағат 10.00-ден 16.00-ге дейін «Керуен Сity» (бұрынғы «Мега») СОСО-да келушілерге бауырсақ пен басқа да тәтті-дәмді ас таратылады. Ал сағат 18.00-ден 22.00-ге дейін эстрада жұлдыздарының қатысуымен мерекелік концерт ұйымдастырылады және аниматорлар көпшілік назарына қызықты шоу ұсынады.

Сонымен қатар, сағат 12.00-ден 17.00-ге дейін «Мега» ойын-сауық орталығында мерекелік шаралар ұйымдастырылып, ұлттық тағамдар таратылады.

Осы күні «Сарыарқа» СОСО-да сағат 16.00-ден 22.00-ге дейін астаналықтар концерттік бағдарламаны тамашалай алады. Сағат 12.00-ден 18.00-ге дейін «Аружан» СОСО-да ұлттық киім киген әртістер халықты қарсы алып киіз үйлерде ұлттық тағамдардан дәм татуға шақырады.

Мереке соңында «Керуен Сity» (бұрынғы «Мега») сауда орталығының жанында ребрендинг құрметіне 22.00-де отшашу болады.

Ал 23 наурызда сағат 17.00-де «Хан шатыр» СОСО-да мемлекеттік филармонияның үрмелі аспаптар оркестрінің концерті өтеді. Мұнымен қоса, сағат 18.00-де «Mega Silk Way» СОСО-ның ашылуына орай мерекелік думан ұйымдастырылады.