Астанадағы ЖОО «футбол жаттықтырушысы» мамандығына оқытады

АСТАНА. ҚазАқпарат - Қазақстан футбол федерациясы мен Лев Гумилев атындағы Еуразия ұлттық университеті Білім және ғылым министрлігінің қолдауымен «футбол жаттықтырушысы» мамандығын дайындау бойынша білім беру бағдарламасын іске қосты. Бұл туралы ҚР футбол федерациясынан мәлім етті.

Әлеуметтік ғылым факультетінің Дене шынықтыру және спорт кафедрасы 2018-2019 оқу жылынан бастап «Футбол жаттықтырушысы» мамандығын ашады. Негізгі мақсаты - кәсіби біліктілігі футбол жаттықтырушыларын және футбол саласының мамандарын дайындау.

Аталған мамандыққа кез келген талапкерге түсуге болады. Оқу аяқталғаннан кейін УЕФА-ның «С» категориясы мен «Дене шынықтыру және спорт, футбол жаттықтырушысы» мамандығын алады. Бұл мамандық бойынша 6-12 жас аралығында балаларды Қазақстан Республикасы мен Еуропа аумағындағы кез келген футбол құрылымдарында тәрбиелей алады.

Бастама 2018-2022 жылдарға арналған футболды дамыту стратегиясының шеберінде жүзеге асырылып отыр. Қазақстан футбол федерациясының басты міндеттерінің бірі - «1-11 сыныптарға арналған футбол сабағы» жобасын дамытуды жалғастыру және Қазақстанда футбол саласының мамандарының білімін көтеру.