Астаналық «Барыс» Мәскеу облысының «Атлантын» жеңді

АСТАНА. Тамыздың 11-і. ҚазАқпарат - Сейсенбі күні Астанада Қазақстан Республикасы Президентінің Кубогы үшін хоккейден бірінші халықаралық турнирдің алғашқы кездесуі өтті. Алаң иелері Мәскеу облысының «Атлант» командасымен кездесті, деп хабарлады Қазақстанның Хоккей федерациясының баспасөз қызметінен.

Ойын басталардың алдында турнирдің салтанатты ашылуы болды. «Нұр Отан» партиясы Төрағасының бірінші орынбасары Нұрлан Нығматулин жиналған қауымды турнирдің басталуымен құттықтады.

Елордалық хоккей жанкүйерлері асыға күткен бұл сайыста «Барыстың» жаңа 9 ойыншысымен танысты және есепті бірінші болып солардың бірі ашты. Кездесу 4:2 есебімен аяқталды.

Астаналықтардың құрамында Максим Худяков (3.13), Лукаш Кашпар (20.13), Вадим Краснослободцев (34.14), Иржи Новотны (38.22) көзге түсті. «Атланттықтардан» Сергей Мозякин (24.19) мен Евгений Нурисламов (50.37) шайба соқты.

Тамыздың 10-ы мен 14-і аралығында өтетін бұл сайысты «Нұр Отан» халықтық демократиялық партиясы мен Қазақстанның шайбалы хоккей федерациясы ұйымдастырып отыр. Турнирдің ақпараттық демеушісі - «Нұр Медиа» медиахолдингі. Турнирға төрт елдің, атап айтқанда Ресей Федерациясы, Латвия, Беларус Республикасы мен Қазақстанның командалары қатысуда.