Астананың оң жағалауына LRT бағытының құрылысы қашан басталады
АСТАНА. KAZINFORM — Астананың оң жағалауында салынатын жаңа LRT желісі бойынша инженерлік зерттеу жұмыстары басталды. Жоба уақытылы қаржыландырылса, құрылысты үш жыл ішінде аяқтау жоспарланып отыр. Бұл туралы CTS басқарма төрағасы Асылбек Дүйсебаев айтты.
CTS басшысының сөзінше, жақын күндері геологиялық зерттеу жұмыстары басталады.
— Қазір оң жағалауда геологиялық зерттеу жүргізіп жатырмыз. Алдағы күндері арнайы қондырғылар орнатылып, жер қабаты зерттеле бастайды. Зерттеу нәтижелері дайын болғаннан кейін ескі вокзалға дейінгі желінің құрылысына кірісеміз, — деді Асылбек Дүйсебаев.
Оның айтуынша, жаңа LRT желісі Сығанақ көшесі бойымен өтіп, «Хан Шатыр» маңында Тұран даңғылына бұрылады. Одан әрі Кенесары көшесіне дейін жалғасады. Кейін Қажымұқан Мұңайтпасов атындағы стадион тұсынан Жеңіс даңғылына шығып, ескі теміржол вокзалына дейін барады.
Сонымен қатар CTS басшысы болашақта оң жағалау мен Қосшы бағытына тартылатын барлық LRT желілері эстакада арқылы салынатынын айтты.
— Бұрын Қосшы бағытына LRT желісін жер үстімен жүргізу жоспарланған еді. Алайда қазір бұл аумақта құрылыс қарқынды жүріп жатыр. Егер желіні жермен жүргізсек, көлік қозғалысына кедергі келтіреді. Сондықтан қазір эстакада арқылы салудан басқа мүмкіндік жоқ, — деді ол.
Дүйсебаевтың сөзінше, жоба уақытылы қаржыландырылса, жаңа желіні үш жыл ішінде аяқтауға болады.
Еске салайық, Астанадағы LRT желісінің алғашқы кезеңі жолаушылар үшін 16–17 мамырда ашылады. LRT операторының бағалауынша, алғашқы кезеңде тәуліктік жолаушылар легі 25 мыңнан 45 мың адамға дейін жетуі мүмкін.
Алғашқы желі Астана халықаралық әуежайын «Нұрлы жол» вокзалымен байланыстырады. Бағыт бойында 18 станса болады. Оның 11-і жер деңгейінде орналасса, 7-еуі эстакада үстінде салынады.
Пойыздардың орташа жылдамдығы сағатына 60 шақырымды құрайды. Ал ең жоғары жылдамдығы сағатына 80 шақырымға дейін жетеді. Жолаушылар бүкіл бағытты шамамен 40 минутта жүріп өтеді.
