Астананың 20 жылдығына орай Бакуде салтанатты қабылдау өтті
БАКУ. ҚазАқпарат - Бакуде орналасқан Әзербайжандағы ҚР Елшілігінде Қазақстан астанасының 20 жылдығына орай ресми қабылдау өтті, деп хабарлайды ҚазАқпарат тілшісі.
Шараға Үкімет басшылары, депутаттар, Әзербайжанның іскерлік және қоғамдық орталардың өкілдері, сондай-ақ, елдегі дипломатиялық корпустың қызметкерлері қатысты.
Әзербайжандағы Қазақстанның елшісі Бейбіт Исабаев өз сөзінде Астана бой көтерген жылдары тек саяси, экономикалық және мәдени орталық қана емес, сондай-ақ, әлемдік және өңірлік деңгейдегі халықаралық іс-шараларды өткізетін орынға айналғанын айтып кетті.
«ТМД елдерінің ішінде алғаш рет Қазақстанның астанасы өткізген «ЭКСПО-2017» халықаралық мамандандырылған көрмесін атап өтпеске болмайды. Астана - ерекше сәулетімен көзге түсетін, Шығыс пен Батысты бір арнаға тоғыстырған қала. Бүгінде Қазақстанның өзіндік брендіне, ұлттық нышаны мен мақтанышына айналып отыр», - деді Б. Исабаев.
