«Астана—Санкт-Петербург» әуе рейсінде бомба бар» — Жалған хабар берген азаматқа сот үкімі шықты

АСТАНА. KAZINFORM — Терроризм актісі туралы жалған хабарлама берген шетел азаматына 2,5 млн теңге айыппұл салынды, — деп хабарлайды Polisia.kz.

2023 жылдың күзінде көліктегі полиция департаменті қызметкерлері 36 жастағы шетелдік азаматты «Астана — Санкт-Петербург» бағытындағы әуе рейсінде терроризм актісі болатыны жаайлы жалған хабар бергені үшін ұстаған болатын. Жоғарыда аталған дерек бойынша сотқа дейінгі тергеу жүргізілді.

Тергеу барысында құқық бұзушы өз кінәсін толық мойындап, жасаған ісіне өкінген. Ол отбасылық жанжалдан кейін жұбайы Санкт-Петербургке ұшып кетпекші болғандықтан, осындай қадамға барғанын түсіндірді. 

— Қаңтар айының соңында Астана қаласының қылмыстық істер жөніндегі ауданаралық сотының шешімімен аталған азамат кінәлі деп танылып, оған 750 АЕК, яғни 2  587 700 теңге мөлшерінде айыппұл түрінде жаза тағайындалды, — деді департамент бастығы Бақытжан Малыбаев.

Малыбаевтың айтуынша, мұндай қадам жасаудың себептері әртүрлі, нақтырақ айтқанда абайсыз жеңіл-желпі сөйлегеннен бастап, қасақана бұзақылыққа дейін. Көбінесе, мұндай қылмыстарды азаматтар масаң күйде жасайды.

— Өкінішке орай, азаматтар әлі күнге дейін осындай теріс қылықтар үшін жауапкершіліктің ауыр екенін біле бермейді. Көлік инфрақұрылымы объектілері бір уақытта өте көп адам шоғырланатын нысан болып табылады. Сондықтан мұндай қауіпті сөздерден кейін бірден құқық қорғау органдарының қызметкерлері объектіні қоршауға алып, адамдарды эвакуациялап, шұғыл қызметтер іске қосылады, рейстер тоқтатылады немесе кешіктіріледі, — деп түйіндеді сөзін ведомство басшысы.

Сондай-ақ, ол терроризм актісі туралы көрінеу жалған хабар бес мың айлық есептік көрсеткішке дейінгі мөлшерде айыппұл түрінде не сол мөлшерде түзеу жұмыстарымен не бес жылға дейінгі мерзімге бас бостандығын шектеумен не сол мерзімге бас бостандығынан айырумен қылмыстық жауаптылықты көздейтінін еске салды.

Сонымен қатар, жалған террористер сот шешімі бойынша оқиға орнына жұмылдырылған жедел әрекет ету қызметтерінің барлық шығындарын толық көлемде өтейді.