Атырау-Индер трассасының Атырау қаласына кіретін бөлігі жабылды

Атырау облысы жедел штабының ақпаратына қарағанда, Жайық өзенінің сол жағалауындағы жолдың жабылуына тасқын судың молдығы себеп болып отыр. 

«Өр суының қарқыны күшеюіне байланысты Атырау-Индер трассасының Атырау қаласына кіретін бөлігі көліктің барлық түрі үшін жабылды. Көлік қатынасы тоқтатылды»,-деп мәлім етті облыстық жедел штабтан.

Штабтың мәліметінше, Жайық өзенінің оң жағалауындағы Атырау-Орал трассасының 44-ші және 71-шақырымы жабық тұр. 

Еске сала кетелік, бұдан бұрын Атырау-Орал трассасының Махамбет ауданындағы 44-шақырымы жырылды.

Кейін Махамбет ауданындағы 56-шақырымы бүлінген еді.  

Сондай-ақ, Атырау-Орал трассасының 71-шақырымында жол үстімен су өтіп жатқанын жазған едік.