Атырау қаласының бір бөлігі мен елді мекендер жарықсыз қалды
АТЫРАУ. KAZINFORM – Атырау қаласында бірнеше шағын ауданда электр жарығы өшіп қалды. Мұнайлы шаһарға іргелес орналасқан елді мекендерде де жарық жоқ.
Атырау облысының энергетикалық кешені баспасөз қызметінің мәліметінше, жарықтың сөнуіне ауа райының қолайсыздығы себеп болған.
«Атырауда жаңбыр жауып, екпінді жел соқты. Соның салдарынан Атырау қаласындағы «Авангард», «Нұрсая», «Жұлдыз-2» шағын аудандарында, Амангелді, Дамбы, Ақжар-1 ауылдарында электр жарығы өшті. Қазір Атырау қалалық электр желісінің арнайы бригадалары ақауды қалпына келтіру жұмысын жүргізіп жатыр», - деп хабарлады энергетикалық кешеннің баспасөз қызметі.
Электр желісіндегі ақауды қалпына келтіруге 8 бригада, 11 көлік, жылжымалы зертхана тартылған.
Еске сала кетелік, бұдан бұрын Атырау қаласындағы бір шағын аудан жарықсыз қалғанын хабарлаған болатынбыз.
