Атырау облысында 2 жасар бүлдіршін балабақшада көзін жарақаттап алған
АТЫРАУ. KAZINFORM – Атырау облысында 2 жасар бала балабақшада жарақат алған. Осыған байланысты қылмыстық іс қозғалды.
Оқиға 5 наурызда Құрманғазы ауданындағы Сафон ауылында болған. Осындағы «Боташым» балабақшасында 2 жасар бала көзін жарақаттап алғаны анықталған.
Атырау облыстық полиция департаментінің баспасөз қызметінен мәлім еткендей, балақайдың жарақат алуына байланысты қылмыстық іс қозғалған.
«Құрманғазы ауданының Сафон ауылында орналасқан балабақшада 2 жастағы сәбидің көзінен жарақат алу дерегіне қатысты қылмыстық іс қозғалды. Баланың жарақатына байланысты сот-медициналық сараптама тағайындалды. Балабақшада орнатылған бейнекамералардағы жазбаларды зерделеу басталды. Балабақша қызметкерлерінен жауап алынып жатыр», - деп хабарлады департаменттің баспасөз қызметі.
Еске сала кетелік, бұдан бұрын Атырауда балаларын сатқан әйел 8 жылға сотталғанын жазған едік.
