Атырау облысының жасөспірімдері 1 жылда 67 қылмыс жасаған

АТЫРАУ. KAZINFORM – Атырау облысындағы жасөспірімдердің былтыр 67 қылмыс жасағаны тіркелген. Алайда бұл – алдыңғы жылғы көрсеткіштен 9,4 пайызға төмен.

Атырау облыстық полиция департаменті жергілікті полиция қызметі басқармасының аға инспекторы Орынгүл Көшқалиеваның жасөспірімдер қауіпсіздігін қамтамасыз ету үшін «Түнгі қаладағы балалар», «Жасөспірім», «Жасөспірім және жауапкершілік» іс-шаралары өткізілген. 

– Атырауда 2024 жылы жасөспірімдердің қатысуымен 67 қылмыс тіркелді. Жасөспірімдер жиі ұрынатын қылмыстың қатарында ұрлық, алаяқтық, бұзақылық, зорлық-зомбылық және есірткімен байланысты құқық бұзушылықтар бар. Түнгі мезгілде балаларын қараусыз жібергені үшін 8 мыңға жуық ата-ана әкімшілік жауапкершілікке тартылды. Ойын-сауық орындарына кәмелетке толмағандарды кіргізген 83 адамға, алкоголь және темекі өнімдерін сатқан 171 кәсіпкерге тиісті шара қолданылды, -дейді Орынгүл Көшқалиева.

Оның дерегіне қарағанда, есірткі қылмысының белең алғаны алаңдаушылық тудырып отыр. Есірткі заттарын заңсыз сақтау және сатумен айналысқан 3 жасөспірім анықталған. 

– Интернеттегі есірткі жарнамасын тоқтату үшін 270 сайт бұғатталып, 100-ден астам граффити жойылды. Балалардың қауіпсіздігі үшін білім беру мекемелері бейнебақылау жүйесіне қосылды. Бір жыл ішінде үйінен кетіп қалған 76 бала табылып, ата-анасына қайтарылды, -деп мәлім етті Орынгүл Көшқалиева.

Еске сала кетелік, бұған дейін Балалардан жын шығаратын емші бұрын Атыраудағы мешіттің күзетшісі болғанын жазған едік.