Атырау-Орал трассасынан Индерборға баратын 7 шақырым жолды су басты
АТЫРАУ. KAZINFORM – Атырау-Орал трассасынан Индер ауданының орталығы – Индербор кентіне баратын 7 шақырым жолды су басты.
Индер ауданының әкімі Дарын Шамұратовтың айтуынша, 8 мамырдан бері аталған жол бөлігінің жиегіне топырақ төгіліп, бөгет тұрғызылған.
«Қазір жол екі жағынан да жабылды. Көлік қозғалысы толықтай тоқтады. Жолға 5-6 сайдан су құйылып жатыр. Осыған дейін жолдың жиегіне топырақ төгіп, бөгеген едік. Бірақ, топырақпен суды ұстап тұру өте қиын», -деп хабарлады Дарын Шамұратов.
Оның айтуына қарағанда, 1993-1994 жылдары дәл осы жолды су шайған.
«Тұрғындар тарапынан «Жол қашан ашылады?» деген сауал туындап отыр. Дәл қазір жолдың қашан ашылатынын айта алмаймыз», -деді Дарын Шамұратов.
Еске сала кетелік, бұдан бұрын су тасқынына байланысты Атырау-Орал трассасынан Индерборға баратын 7 шақырым жол жабылатынын хабарлаған едік.