Атырау жасөспірімдері арасында құқық бұзушылық пен суицид дерегі өскен

АТЫРАУ. KAZINFORM — Былтыр Атырау облысының білім саласында 1 200-ден астам құқық бұзушылық дерегі анықталған. Әсіресе, жасөспірімдер арасындағы құқық бұзушылық пен суицид дерегі артқан. 

Атырау облысының үйлестіру кеңесінің жиынында кәмелетке толмаған жасөспірімдер арасындағы құқық бұзушылық мәселелері қаралды. Облыс прокуроры Бауыржан Жұмақановтың дерегіне сүйенсек, жасөспірімдер тарапынан жасалатын құқық бұзушылық дерегі 21 пайызға (100-ден 121-ге) өскен. Оның ішінде жыныстық тиіспеушілік 38,7% (31-ден 43-ке), балалар суициді 156,3% (16-дан 41-ге) артып отыр.

«Барлық меншік нысанындағы білім мекемелеріне тексеру жүргізіліп, 1 200-ден астам құқық бұзушылық анықталды. Әсіресе, қауіпсіздік, құрылыс, мемлекеттік сатып алу, білім сапасы, санитарлық-эпидемиологиялық нормалар, өрт қауіпсіздігі саласында кемшіліктер бар. Әр баланың қауіпсіздігін қамтамасыз етуіміз қажет. Өйткені, басты басымдықтың бірі — жасөспірімдер арасында құқық бұзушылықтың алдын алуда құқықтық сана мен мәдениетті қалыптастыру», - дейді Бауыржан Жұмақанов.

Еске сала кетелік, бұған дейін Атырауда 101 жол-көлік оқиғасынан 16 жасөспірім мерт болғанын хабарлаған едік.