Атырауда 10 айлық сәбидің өліміне байланысты қызметтік тексеру жүргізіледі

АТЫРАУ. KAZINFORM – Атырау қаласындағы №2 облыстық ауруханада 10 айлық сәби шетінеген еді. Осыған байланысты қызметтік тексеру жүргізетін арнайы комиссия құрылды. 

Атырау облыстық денсаулық сақтау басқармасы баспасөз қызметінің мәліметінше, сәбидің шетінеу дерегіне қатысты тексеру жүргізу көзделіп отыр. 

– Денсаулық сақтау басқармасында сәби өліміне қатысты қызметтік тексеру жүргізу үшін арнайы комиссия құрылды. Қызметтік тексерудің қорытындысымен тиісті шешім қабылданады, - деп мәлім етті басқарманың баспасөз қызметінен. 

Еске сала кетелік, бұған дейін Атырау ауруханасында 10 айлық сәби көз жұмғанын хабарлаған болатынбыз. 

Науқас 6 желтоқсанда сағат 14:51-де аталған аурухананың қабылдау бөліміне түскен. Кезекші дәрігер ауруханаға жатып емделді ұсынғанымен, анасы қолхат жазып, бас тартқан. 

Сәби сол күні кешкі сағат 18:10-да ауруханаға ауыр жағдайда қайта жеткізілген. Оның жүрек соғысы бірнеше рет тоқтап, соған байланысты реанимациялық шаралар жүргізілген. Алайда 10 айлық бала 7 желтоқсан күні, сағат 00:20-да көз жұмған.