Атырауда 11 жылдан бері пайдаланылмаған жері телімі мәжбүрлеп алынады
АТЫРАУ. KAZINFORM – Атырауда ЖШС 2014 жылдан бері жер телімін иеленіп келген. Екі жыл бұрын ЖШС-ға жер заңнамасының бұзылуын жою туралы ұйғарым шығарылған.
Жоғарғы соттың мәліметінше, бір жылдан кейін қайтадан жүргізілген тексеру кезінде жер телімінің игерілмегені анықталған. Осыған байланысты бірінші сатыдағы сот Атырау облысы бойынша жер ресурстарын басқару жөніндегі департаментінің меншік иесінен мақсаты бойынша пайдаланылмай жатқан жер телімін мәжбүрлеп алып қою туралы талап қоюын қанағаттандырған.
– Алайда, апелляция ЖШС-ның ұйғарымды орындау (жобалау-құрылыс жұмыстарын жүргізуге шарт жасау және сәулет-жоспарлау тапсырмасын келісу) бойынша шаралар қабылдағанын алға тартып, бұл шешімнің күшін жойған. Бірақ бұл шаралар жер телімін игерудің бастапқы бөлігі болып табылады. Жер кодексінің 94-бабында жер учаскесін нысаналы мақсаты бойынша пайдалану шараларын қабылдау үшін бір жыл мерзім көзделгені ескеріліп, бұл шаралар іс жүзінде ұйғарым шығарылғанға дейін қабылдануы тиіс, - деп хабарлады Жоғарғы соттан.
Жоғарғы соттың азаматтық істер жөніндегі сот алқасы зерделеу кезінде мынадай жайтқа назар аударды. Біріншіден, егер жобалық-сметалық құжаттамада басқа мерзім көзделмесе және учаске жеке тұрғын үй құрылысына арналмаған болса, жер учаскесін игеру оны бөлу туралы шешім қабылданған күннен бастап 3 жыл ішінде жүзеге асырылуы тиіс. Екіншіден, шарт жасасу және құжаттаманы бекіту учаскені әзірленген деп тану үшін жеткілікті негіз бола алмайды. Үшіншіден, жер учаскесінде іс жүзінде оны игеру үшін құрылыс басталмаған. Бұл Жер кодексінің 92-бабының талаптарына қайшы келеді.
Сол себептен Жоғарғы сот мақсаты бойынша пайдаланылмай жатқан жер учаскесін мәжбүрлеп алып қою ісі бойынша бірінші сатыдағы соттың шешімін қалпына келтірді.
Еске сала кетелік, бұдан бұрын Атырауда сұйытылған мұнай газын сақтайтын компания негізсіз кіріс тапқанын жазған болатынбыз.
