Атырауда 200-ге жуық шырша егілді
АТЫРАУ. KAZINFORM – Атырау қаласының көшелеріне егу үшін 200-ге жуық шырша жеткізілді. Шыршаның биіктігі – 2 метр.
Атырау қалалық әкімінің баспасөз хатшысы Ғасырбек Төлегеннің айтуынша, шыршаның канадалық және Глаука түрі Орал қаласынан жеткізілген.
«Қылқан жапырақты ағаштар Орал қаласындағы бақта өсірілген. Шыршаның биіктігі шамамен 2 метр болады. Шыршалар Атырауға түп-тамырымен жеткізілді. Қаланың сәнін келтіретін канадалық және глаука шыршасы 4-5 метрге дейін өседі. Қазір шыршалар Қ.Сәтпаев даңғылының бойына, ретросаябақ пен теміржол вокзалының аумағына отырғызылды. Бұл жұмыс қала аумағын абаттандыру мақсатында қолға алынды», - дейді Ғасырбек Төлеген.
Оның айтуынша, алдағы уақытта шаһар көшелеріне 300-ге жуық қайың көшетін егу жоспарланып отыр. Оның кейбірі жергілікті бақтан алынады. Сондай-ақ, Ресей Федерациясындағы Тольятти қаласынан әкелу жоспарланған.
Еске сала кетелік, бұған дейін Атырауда Жайық өзенінің үстіндегі көпір ойылып қалғанын хабарлаған болатынбыз.
Кейін Жайық үстіндегі көпірдің ойығы түн ішінде жөнделгенін жазған едік.
