Атырауда сауда-ойын сауық орталығындағы өрт оқшауланды

АТЫРАУ. KAZINFORM – Атырау қаласындағы «Байзар» сауда-ойын сауық орталығының ғимараты өртенді. Жергілікті құтқарушылар жалынды оқшаулағанымен, сөндіру жұмысы әлі жалғасып жатыр.

Атырау облыстық төтенше жағдайлар департаментінің қоғаммен байланыс тобынан хабарлағандай, сауда орталығындағы өрт сағат 21:53-те оқшауланған. 

«Атырау қаласында орналасқан «Байзар» ойын-сауық орталығындағы өрт оқиғасына байланысты төтенше жағдайлар департаментінің дағдарыс орталығында қауырт желі іске қосылды. Тұрғындарға 45-14-75 нөмері арқылы ақпараттық қолдау көрсету және шұғыл психологиялық көмек көрсетіледі», -деп хабарлады департаменттің қоғаммен байланыс тобы. 

Сауда-ойын сауық орталығындағы өрт туралы бүгін, 27 қазанда сағат 18:37 шамасында шақырту түскен. 

«Департаменттің өрт сөндірушілері Атырау қаласындағы сауда-ойын сауық кешеніндегі өртке байланысты оқиға орнына жедел жетті. Қазір сауда орталығының ғимаратынан 80 адамды, оның ішінде 45 баланы қауіпсіз жерге эвакуациялады. Оқиға орнында штаб құрылып, өртті сөндіру жұмыстары жүргізіліп жатыр», -деп мәлім етті департаменттің қоғаммен байланыс тобынан. 

Өрттен ешкім зардап шекпеген. Жалын сөндіруге Атырау облыстық төтенше жағдайлар депаратментінен 90 құтқарушы, 12 техника тартылған. 

Еске сала кетелік, бұдан бұрын атыраулық құтқарушылар шатыры өртенген үйден 82 жастағы әжені арқалап шығарғанын хабарлаған болатынбыз.