Атырауда Жайық өзенінде 50-ге жуық кеме қатысқан шеру өтті
АТЫРАУ. KAZINFORM – Атырауда өткен «Қазыналы Каспий» халықаралық балық фестивалі аясында Жайық өзенінде кемелер шеруі ұйымдастырылды.
Фестивальдің ең көрнекті іс-шараларының біріне айналған салтанатты шеруге 50-ге жуық кеме қатысты.
Бейбарыс Сұлтан көпірінен басталған шеру Тұрғындар қалашығы көпіріне дейін жалғасып, өзен бойына жиналған тұрғындар мен қала қонақтарына ерекше әсер сыйлады.
Кемелер шеруі өңірдің өзен және теңіз мәдениетін, су көлігі саласының әлеуетін және Каспий маңының бай мұрасын насихаттауға бағытталды.
Өзен бойымен сап түзеген ондаған кеме Атыраудың су жолдарымен тығыз байланысты тарихын дәріптеп, Жайық өзенінің өңір өміріндегі ерекше орнын айшықтады.
– «Қазыналы Каспий» фестивалі Каспий өңірінің балық шаруашылығы дәстүрлерін дәріптеуге, экологиялық мәдениетті қалыптастыруға және өңірдің туристік әлеуетін арттыруға бағытталған. Кемелер шеруі – фестивальдің ең көрнекті бөліктерінің бірі. Бұл шара арқылы Жайық өзенінің өңір тарихы мен тіршілігіндегі маңызын көрсетуді мақсат еттік, – деп мәлімдеді Атырау облыстық Ауыл шаруашылығы және жер қатынастары басқармасы.
Мұндай іс-шара былтыр да ұйымдастырылған еді. Балықшылар күніне орайластырылған шеруге өткен жылы 30-ға жуық кеме қатысты.
Бұған дейін Қазақстанның батысындағы үш өңірде браконьерлерден 8 тоннадан аса балық пен 10 келі уылдырық тәркіленгенін жазған едік.
