Атырауда қымбат мейрамханадағы төбелестен соң қылмыстық іс қозғалды
АТЫРАУ. KAZINFORM – Атырауда мейрамханада болған төбелестен кейін қылмыстық іс қозғалды. БАҚ-та тараған дерекке қарағанда, олар мемлекеттік мекемелердің қызметкерлері болуы мүмкін.

Бұл деректі Атырау облыстық полиция департаментінің баспасөз қызметі растады.
Төбелес кеше, 28 қаңтарда Атырау қаласындағы Villa Beer House мейрамханасында болған.
– Аталған дерек бойынша ҚР Қылмыстық кодекстің 106-бабының 1-бөлігімен қылмыстық іс тіркелді. Қазір кешенді тергеу амалдары жүргізіліп жатыр. Өзге ақпарат тергеу мүддесіне сәйкес жариялауға жатпайды, -деп мәлім етті департаменттің баспасөз қызметі.
Ал Криминальный Казахстан телеграм арнасы төбелес прокуратура мен мемлекеттік кіріс департаментінің қызметкерлері арасында болғанын хабарлады. Төбелестен кейін 1 адам ауруханаға түскен.
Еске сала кетелік, бұдан бұрын Атырау облысында төбелестен 1 адам мерт болып, 2-еуі ауруханаға түскенін жазған болатынбыз.