Атыраудың экс-әкімінің ісі: Шенеуніктерге берілген жаза өзгеріссіз қалды

АТЫРАУ. KAZINFORM – Атырау облыстық сотының қылмыстық істер жөніндегі сот алқасында Атырау қаласы әкімдігінің бұрынғы лауазымды тұлғаларына қатысты қылмыстық іс қаралды. Оған адвокаттардың апелляциялық шағымдары, Атырау облысы прокуроры орынбасарының апелляциялық өтінішхаты себеп болған.

Атырау облыстық сотының баспасөз қызметінен мәлім еткендей, бірінші саты сотының үкімімен К.Е. және У.К. ҚР Қылмыстық кодекстің 361-бабының 4-бөлігінің 3-тармағы бойынша кінәлі деп танылған. Сот К.Е.-ға 5 жыл, ал У.К.-ға тағылған айыптың аз көлемі ескеріліп, 3 жыл мерзімге бас бостандығын шектеу түріндегі жаза тағайындалған.

Тағы бір айыпталушы К.Н. ҚР Қылмыстық кодексінің 361-бабының 4-бөлігінің 3-тармағымен, 369-бабының 1-бөлігімен кінәлі деп танылып, 6 жыл мерзімге бас бостандығы шектелген. Олар өмір бойына мемлекеттік қызметте лауазымдарды атқару құқығынан айырылды.

– И.Ж. ҚР Қылмыстық кодексінің 361-бабының 4-бөлігінің 3-тармағы бойынша оның әрекеттерінде қылмыстық құқық бұзушылық құрамының болмауына байланысты ақталды. Ал У.К. 369-бабының 3-бөлігі, К.Е. және И.Ж. 369-бабының 1-бөлігі, К.Е., К.Н. және И.Ж. 190-бабының 4-бөлігінің 2-тармағы бойынша олардың әрекеттерінде қылмыстық құқық бұзушылық құрамының болмауына байланысты ақталды, - деп хабарлады облыстық соттың баспасөз қызметі.

Сот бұрынғы шенеуніктерге қатысты мынадай жайттарды анықтаған. У.К. қала әкімі бола тұра, жер қатынастары бөлімінің басшысы К.Н. және сәулет және қала құрылысы бөлімінің басшысы К.Е.-ге рекреациялық аймақтағы 8 жер учаскесін беру туралы тапсырма берген. Сотталушылар К.Н. және К.Е. өзара сөз байласып, рекреациялық және санитарлық аймақтардан 18 жер учаскесін берген. Осылайша, К.Н. жер комиссиясының хаттамасының қосымшасына комиссия отырысында қаралған деп 18 өтініш туралы жалған мәліметтер енгізген.

Алайда тағылған айыптың кейбірі расталмады. Біріншіден, И.Ж. қызметтік өкілеттіктерді асыра пайдаланды деген айыппен оның осы қылмысты жасауға қатысы бар екендігі туралы жеткілікті дәлелдер тергеумен ұсынылмаған. Оның қызметтік өкілеттігіне рекреациялық және санитарлық аймақтардағы жер учаскелерін беру мәселесі кірмеген.

Екіншіден, У.К., К.Е. және И.Ж.-ға тағылған айыптауда жер учаскесін таңдау актілері, жер комиссиясының хаттамалары және тағы басқа құжаттарға жалған мәліметтер немесе түзетулер енгізілгені нақтыланбаған.

Үшіншіден, аталған сотталушылардың құжаттарға жалған мәліметтер енгізу фактілері анықталмаған.

Төртіншіден, қылмыстық қудалау органы мүлікті жымқыру дәлелдерін ұсынбаған. Сотталушылардың бірдей әрекеттері өкілеттіктерді теріс пайдалану және алаяқтық ретінде әртүрлі баптар бойынша дәрежеленген.

Облыстық соттың апелляциялық алқасы бірінші сатыдағы сот материалындағы осындай жайттарды зерделеді. Сонан соң бірінші саты сотының қорытындыларымен келісті.

– Сот үкімін өзгеруге немесе оның күшін жоюға негіздер анықталмады. Осыған байланысты қылмыстық істер жөніндегі сот алқасының қаулысымен бірінші саты сотының үкімі өзгеріссіз қалдырылды, -деп мәлім етті облыстық соттың баспасөз қызметінен.

Еске сала кетелік, бұдан бұрын Атырау қаласының экс-әкімі Қайрат Оразбаевтың ісіне қатысты сот үкімі шыққанын жазған едік.

Кейін Атыраудың экс-әкімінің ісіне байланысты шенеуніктерге тағылған қандай айыптаулар расталмағанын хабарладық.