Атыраудың Махамбет ауданында Жайық өзенінің жайылмасына су шықты
АТЫРАУ. KAZINFORM – Атырау облысының Махамбет ауданында Жайық өзенінің жайылмасына су шығып жатыр.
Атырау облысының жедел штабынан мәлім еткендей, бүгін Махамбет ауданындағы 17 учаскеге қарғын судың жайылғаны тіркеліп отыр.
«Махамбет ауданы әкімдігінің мәліметінше, жыл сайын су Жайық өзенінің жайылмасына 9 мамырдан бұрын келмейтін еді. Биыл қарғын су әдеттегіден екі апта бұрын келді. Қазір Жайық өзенінен Төлеп-Қарасу, Қоржын, Алмағамбет, Өлішығанақ, Гагушкин, Қызылжар, 15-ауыл, 13-ауыл, Петрушкин, 12-ауыл, 9-ауыл, Қарашығанақ, Кіші Қарашығанақ, 8-ауыл, Бақсай, Глухой және Сборный жайылмасына қарғын судың шыққаны тіркелді», - деп хабарлады облыстық штабтан.
Махамбет аудандық кәсіпкерлік және ауыл шаруашылығы бөлімінің басшысы Олжас Мырзабаевтың мәліметіне сүйенсек, жеке иеліктегі малды шығару үшін 17 қауіпсіз аумақ белгіленген.
«Біздің ауданда 50 мыңға жуық мал бар. Қауіпті аумақтарда көктемгі егіс жұмыстарымен айналысатын 46 шаруа қожалығының басшыларына алдын ала ескерту берілді. Қазір қауіпсіз айуақтарға 4 мыңнан астам мал айдалды. Қауіпсіз аумақтардың маршруты мен картасы ауылдық округ әкімдері, аудандық жер қатынастары бөлімі және ауыл ақсақалдарымен бірлесіп әзірленді», - деп мәлім етті Олжас Мырзабаев.
Еске сала кетелік, бұдан бұрын Атырау облысының БҚО-мен шекарадағы Бағырлай каналына мол су келгенін жазған едік.
Кейін Индер ауданында 7 мыңға жуық мал қауіпсіз аумаққа шығарылды.
