Атыраулықтар Хиуаз Доспанованың әуежайдағы ескерткішіне гүл шоғын қойды
АТЫРАУ. KAZINFORM – Атыраудағы халықаралық әуежай Халық қаһарманы Хиуаз Доспанованың есімімен аталады. Әуежай алаңына қазақтан шыққан тұңғыш ұшқыш қыздың ескерткіші қойылған.
Бүгін Атырау жұртшылығы Жеңіс күні мерекесі аясында даңқты ұшқыштың рухына тағзым етті. Ескерткішке гүл шоғын қойды.
– Жеңіс күні – календарлық дата ғана емес, майдангерлер ерлігімен жазылған тарих. «Қанатты қыз» атанған ұшқыш Хиуаз Доспанова – қазақ қызының өжеттігін батылдығымен, жанқиярлығымен дәлелдеген батыр. Ол Отанды сүюдің үлгісін көрсетті, -деді облыс әкімі Серік Шәпкенов.
Үкімет қаулысымен 2020 жылы Халық қаһарманы Хиуаз Доспанованың есімі Атырау халықаралық әуежайына берілген еді. Ол 1922 жылы Атырау облысындағы Құрманғазы ауданында өмірге келген.
1940 жылы Оралдағы №1 орта мектебін үздік бітірген. Осы қаладағы аэроклубта ұшқыштың алғашқы әліппесін меңгерген.
Екінші дүниежүзілік соғыста ұшқыш, штурман-атқыш болған. Солтүстік Кавказ, Кубань, Қырым, Украина, Беларусь, Польша, Германия аспанындағы шайқастарға қатысқан. Майданда 300-ден аса жауынгерлік операцияны орындаған.
Еске сала кетелік, бұдан бұрын Кеңес Одағының Батыры атағына 2 рет ұсынылғандар арасында 6 қазақ болғанын жазған болатынбыз.
