Атыраулықтарға «арзан жиһаз ұсынған» алаяққа сот үкім шығарды

АТЫРАУ. KAZINFORM — Түркістан облысының тұрғыны 2023 жылдың ақпанында Шымкент қаласынан арзан жиһаз ұсынып, WhatsApp желісінде мобильді телефон нөмерін қалдырған. Бұл жарнамаға атыраулық тұрғындар қызығушылық танытқан. 

Облыстық полиция департаментінің баспасөз қызметінен мәлім еткендей, Атырау қаласының тұрғындары банк қосымшасы арқылы 6 айға несие рәсімдеген. Жарнама берушіге алдын ала төлем ретінде қомақты қаржы аударған.

«Мәселен, Атырау қаласының 1957 жылғы тұрғыны Шымкент қаласынан 24 дана орындық алдыруға тапсырыс берген. Ол 6 айға 675 мың 996 теңге несие рәсімдеп, 833 мың теңге көлемінде аударым жасаған. Алайда, тапсырыс берген тауар келмей, сатушымен байланыс үзілген. Нәтижесінде 66 жастағы қала тұрғынына 1 млн 508 мың 996 теңге материалдық шығын келген», — деп хабарлады департаменттің баспасөз қызметі. 

Атырау облыстық полиция департаменті криминалдық полиция басқармасының қызметкерлері жедел іздестіру іс-шарасын жүргізген. Күдікті ретінде Түркістан облысының 1994 жылғы тұрғынын анықтаған.

«Күдіктінің, дәл осындай алаяқтық жолмен Атырау қаласының үш тұрғынын алдап, жәбірленушілердің 4 млн теңге көлемінде ақша қаражатын иемденгені анықталды. Сотқа дейінгі тергеу кезінде 29 жастағы күдікті өзінің қылмыс жасағанын толықтай мойындады. Атырау қаласының № 2 сотының шешімімен күдікті қылмыстық құқық бұзушылыққа кінәлі деп танылды. Күдіктіге 3 жыл мерзімге бас бостандығын шектеу жазасы тағайындалды», - деп мәлім етті департаменттің баспасөз қызметінен.

Еске сала кетелік, интернет-алаяқтарға атыраулықтар 400 млн теңге беріп қойғанын хабарлаған едік.