Атлант мұхитында екі атом сүңгуір қайығы соқтығысып қалды
МӘСКЕУ. Ақпанның 16-сы. ҚазАқпарат - Ақпан айының басында Атлант мұхитында ядролық оқтұмсықты зымырандары бар екі сүңгуір қайық – британдық Vanguard қайығы мен француздың Le Triomphant қайығы соқтығысып қалған.
Оқиға салдарынан ешкім зардап шекпеген, радиация таралмаған, деп хабарлайды ҚазАқпарат РИА «Новости» агенттігіне сілтеме жасап. Оқиға шамамен, ақпанның 3 немесе 4-і күні Атлант мұхитының ашық суында орын алған. Субмариндардың бортында жалпы есепте 21 теңізші болған, бәрі дін аман. Корпусы айтарлықтай майысқан британдық сүңгуір қайық кеше Шотландиядағы Faslane әскери-теңіз базасына сүйреп жеткізілген. Ал гидроакустикалық жүйесі біраз зақымданған француз сүңгуірі Францияның батысындағы Брест айлағына өзі жүзіп жеткен.
