Атырау әуежайы, КИМЭП университеті Үкіметтің жекешелендіру тізімінен алынып тасталды
АСТАНА. ҚазАқпарат – Үкімет жекешелендіру тізімінен алынған нысандар тізімін жариялады, деп хабарлайды ҚазАқпарат тілшісі.
Үкімет «Жекешелендірудің 2021-2025 жылдарға арналған кейбір мәселелері туралы» Қазақстан Республикасы Үкіметінің 2020 жылғы 29 желтоқсандағы №908 қаулысына өзгерістер енгізген.
«Қаулыға 3-қосымшада «Жекешелендіруге жататын республикалық меншіктегі ұйымдар тізбесінде «ҚР Ғылым және жоғары білім министрлігі» бөлімінде 3.2-жол («КИМЭП университеті» коммерциялық емес АҚ) алып тасталсын. 4-қосымшада бәсекелес ортаға беру ұсынылатын коммуналдық меншіктегі ұйымдар тізбесінде «Атырау облысының әкімдігі» бөлімінде 34.3-жол (Хиуаз Доспанова атындағы «Атырау халықаралық әуежайы» АҚ) алып тасталсын», - деп жазылған құжатта.
Сонымен бірге, «Түркістан облысының әкімдігі» бөлімінде 179-1.48-жол – «Turkistan» индустриялық аймақтарын басқарушы компания» ЖШС, «Алматы қаласының әкімдігі» бөлімінде 373-2.15-жол – «Алматы қаласының мамандандырылған жерлеу қызметтер комбинаты» ЖШС тізімнен алынған.
Қаулының 5-қосымшасында акционерлік қоғамдардың және олармен үлестес өзге заңды тұлғалардың бәсекелес ортаға беруге ұсынылатын еншілес, тәуелді ұйымдары тізбесінде «Astana» әлеуметтік-кәсіпкерлік корпорациясы» АҚ» бөлімінде 122.1-жол – «Астана – арнайы қызмет көрсету бюросы» ЖШС, «Алматы» әлеуметтік-кәсіпкерлік корпорациясы» АҚ» бөлімінде 149-1.5-жол – «Алматы қаласы әкімдігінің күрделі құрылыс кәсіпорны» ЖШС жекешелендіруден алынған.
Осы қаулымен бекітілген жекешелендірілетін квазимемлекеттік сектор субъектілері тізіміне енгізу қағидаттарында бірінші абзац мынадай редакцияда жазылады:
«Квазимемлекеттік сектор субъектісіне қатысты мемлекеттік басқарудың тиісті саласына басшылық ету жөніндегі уәкілетті органның оны мемлекеттің экономикалық мүдделерін ескеріп іске асырудың негізділігіне оң бағасының болуы шартымен мынадай өлшемшарттардың біріне сәйкес келуі оны жекешелендірілетін квазимемлекеттік сектор субъектілері тізіміне енгізуге бастама жасау үшін негіз болып табылады».
Бұл қаулы алғаш ресми жарияланған күнінен кейін, яғни 2023 жылғы 4 наурызда қолданысқа енеді.
