Атырау облысы мемлекеттік бюджетке 559 млрд теңге аударды
НҰР-СҰЛТАН. ҚазАқпарат – Осы жылдың 5 айында Атырау облысы мемлекеттік бюджетке 559 млрд теңге салық аударды. Бұл туралы Орталық коммуникациялар қызметіндегі брифинг барысында Атырау облысының әкімі Махамбет Досмұхамбетов айтты, деп хабарлайды ҚазАқпарат тілшісі.
«2021 жылдың 5 айында мемлекеттік бюджетке 559 млрд теңге, оның ішінде, республикалық бюджетке 384 млрд теңге салық аударылды. Бұның сыртында, Ұлттық қорға 357 млрд теңге түсті. Жыл басынан бері негізгі капиталға салынған инвестициялар 1 трлн 15 млрд теңгені құрады. Жалпы 2021 жылға болжам - 3,8 трлн теңге», - деді Махамбет Досмұхамбетов.
Оның дерегінше, 5 айда өнеркәсіп өнімінің көлемі 3,2 трлн теңгені құрады. Облыстың республиканың өнеркәсібіндегі үлес салмағы – 22,7 пайыз.
«19,5 млн тонна мұнай және 10,2 млрд текше метр ілеспе мұнай газы өндірілді. Биыл Кәсіпкерлікті қолдау картасы аясында 837 млрд теңге болатын 5 жобаны жүзеге асырып, 560 жұмыс орнын ашу жоспарлануда», - деді облыс әкімі.
