Атырау облысында 1,1 млн теңгеден астам айыппұлын төлемеген жүргізуші ұсталды
АТЫРАУ. ҚазАқпарат – Атырау облысында 1,1 млн теңгеден астам айыппұлын төлемеген жүргізуші ұсталды. Оның көлігі Мақат ауданындағы арнайы тұраққа қойылды, деп хабарлайды ҚазАқпарат тілшісі.
Облыстық полиция департаментінің баспасөз қызметінен мәлім еткендей, айыппұлын төлемеген жүргізуші Атырау – Ақтөбе бағытындағы жолда ұсталған.
«Патрульдік полиция басқармасының қызметкерлері жергілікті уақытпен сағат 16:30 шамасында Kia маркалы автокөлікті тоқтатты. Жүргізушінің құжаттарын тексеру кезінде 1968 жылғы тұрғынның осы кезге дейін төленбеген 52 айыппұлы бары анықталды. Айыппұлдың жалпы сомасы 1 млн 152 мың теңгені құрайды. Сол себептен, жүргізушінің көлігі ҚР Әкімшілік құқық бұзушылық туралы кодексінің 785-бабына сәйкес, Мақат аудандық ішкі істер бөлімінің арнайы тұрағына жеткізілді», -деп хабарлады департаменттің баспасөз қызметі.
Жүргізуші айыппұлдың жинақталып қалғанынан хабарсыз екенін айтқан. Ол шетелде тіркелген көліктер туралы ақпараты «Сергек» камерасы арқылы тіркелетінін білмегенін жеткізген.
«Тұрғындардың дені заңды толық білмегендіктен, құқық бұзады. Бірақ, бұл оларды жауапкершіліктен босатпайды. Сол себептен, тұрғындарға, әсіресе, көлік жүргізушілеріне автокөлікті сатып алу кезінде құжаттарының дұрыстығын тексеру қажеттігін ескертеміз», -деп мәлім етті департаменттің баспасөз қызметі.
Еске сала кетелік, бұған дейін атыраулықтар көлікке 312,8 млн теңге салық төлемегенін жазған болатынбыз.
Атырау қалалық мемлекеттік кірістер басқармасы басшысының орынбасары Нұрболат Сармановтың мәліметіне сүйенсек, жыл басында жүргізушілердің көлік салығына қарызы 200 млн 647 мың теңге болған. Қазір көлік салығын төлемеген 10 868 адамның берешегі 312 млн 842 мың теңгеге жеткен.
