Атырау облысында 18 наурыздан бері коронавирус жұқтырғандар тіркелген жоқ
АТЫРАУ. ҚазАқпарат – Атырау облысында 18 наурыздан бері коронавирус инфекциясынжұқтырғандар тіркелген жоқ, деп хабарлайды ҚазАқпарат.
Облыстық денсаулық сақтау басқармасының баспасөз қызметінен мәлім еткендей, 17 наурызда қауіпті вирусқа 1 адам шалдыққан. Ал, 18 наурыздан бері коронавирус инфекциясын ешкім жұқтырмаған.
«Қазір өңірдегі инфекциялық стационарларда 6 науқас емделіп жатыр. Өз үйінде 27 адам ем-дом қабылдау үшін оқшауланған. Соңғы бірнеше тәулікте коронавирус инфекциясынан қайтыс болғандар тіркелген жоқ», -деп хабарлады басқарманың баспасөз қызметі.
Атырау облысында былтырғы 1 ақпаннан бері COVID-19 инфекциясына қарсы вакциналардың I компонентін 269 863 адам ектірген. Вакциналардың II компонентін салдырғандар саны 256 764 адамға жетіп отыр.
«Былтырғы 20 қарашада басталған Рfizer вакцинасын алатын 12-18 жас аралығындағы 63 138 жасөспірім бар. Бала емізіп отырған және жүкті әйелдер саны – 35 362. Содан бері Рfizer екпесін 7 622 адам салдырды. Ал 97 493 адам қайта вакциналаудан өтетіндер тізіміне енгізілген. Ревакциналауды бірінші кезекте дәрігерлер мен полицейлер, мұғалімдер, құқық қорғау органдары мен арнайы мекемелердің қызметкерлері, мемлекеттік қызметшілер, сондай-ақ, студенттер мен созылмалы сырқатымен есепте тұрған пациенттер алып жатыр. Бүгінге дейін қайта вакциналаудан 50 999 адам өтті», -деп мәлім етті басқарманың баспасөз қызметінен.
Еске сала кетелік, бұған дейін Атырауда облыстық ауруханада гемодиализ орталығы ашылғанын жазған едік.
