Атырау облысында 82 мың адам медсақтандырудан өтпеген
АТЫРАУ. ҚазАқпарат – Атырау облысында 82 мыңнан астам адам сақтандырылмаған, деп хабарлайды ҚазАқпарат.
«Әлеуметтік медициналық сақтандыру қоры» КЕАҚ Атырау облыстық филиалының директоры Сәбит Құралбектің мәліметінше, өңірде биылғы 1 қарашаға дейін сақтандырылмаған азаматтар саны 82 373 адамды құраған.
«Қазір тіркелген 652 478 азаматтың 82 373-і (12,6%) сақтандырылмай отыр. Он бес санаттағы жеңілдігі бар азаматтар бірыңғай жиынтық төлем төлеу арқылы 42 500 теңге көмек алды. Ал, бірыңғай жиынтық төлемді заң бойынша өзін-өзі қамтыған азаматтар төлеуі тиіс болатын. Осылайша жеңілдікті пайдаланатын санаттағы азаматтар өз статусын жоғалтып алды. Сонымен бірге, Үкіметтің 20 сәуірдегі №224 қаулысына сәйкес шағын және орта кәсіпкерліктің 29 санаты биылғы 1 қазанға дейін өз қызметкерлері үшін жарна төлемей, тек тізімін дерекқорға енгізуі қажет еді. Бірақ, барлығы бірдей тізімді енгізбеуіне байланысты қызметкерлері сақтандырылмай қалған», - деді Сәбит Құралбек.
Оның айтуынша, әсіресе, жеке секторда жұмыс істейтін азаматтардың кейбірі ай сайынғы жалақыны қолма-қол алғандықтан сақтандырылмай отыр.
Алайда, сақтандырылмаған азаматтар емхананың тіркеу бөлімінен медициналық сақтандыру туралы кеңес ала алады.
