Атырау облысында аламан бәйгеге автомобиль тігілді

АТЫРАУ. ҚазАқпарат - 9 мамыр күні Атырау облысы Махамбет ауданында Екінші дүниежүзілік соғыстағы Жеңістің 72 жылдығына орай, аламан бәйге мен көкпар ойыны өтеді.

Бәйгенің жеңімпазы сыйлық ретінде автомобиль алады, деп хабарлайды «ҚазАқпарат» ХАА тілшісі.

«Бұл жарыстарды Жеңіс күні өткізіп жатқанымыз кездейсоқтық емес. Бұл - біздің болашақ Отан қорғаушыларымызға ерлік пен батылдықты насихаттайтын ұлттық спорт түрі болып табылады», - деді аудан әкімі Әлимұхамед Құттымұратұлы. Аламан бәйге жарысы 24 шақырым аралықта өткізіледі, жеңімпаз - «Уаз-Патриот» автомобиліне ие болса, 2 және 3 орын иегерлері - 700 және 400 мың теңге көлемінде қаржылай сыйақы алады.

Көкпар ойынының жеңімпазына бірінші орын алғаны үшін 400 мың теңге, ал 2 және 3 орын иегерлеріне сәйкесінше 300 және 100 мың теңге табысталады. Іс-шараны Махамбет ауданының әкімдігі ұйымдастырып, сыйақылар демеушілік қаржылар есебінен беріледі.

Жарыс 9 мамыр күні сағат 11:00-де Ақтоғай ауылына жақын жерде Атырау-Орал тасжолының 77 шақырымында өтеді. Аламан бәйгені тамашалағысы келетін қала тұрғындарына көлік беріледі. Ол 9 мамыр күні сағат 10:00-де «Нұр Отан» партиясының қалалық бөлімшесінен  жолға шығады. Қалаға келу уақыты - 14.00. Қатысушыларды тіркеу 4-7 мамыр аралығында, толық ақпаратты мына телефондар арқылы алуға болады: 8 (71236) 2-13-75, 8 (71236) 2-11-99 және 8 (71236) 2-45-94.