Атырау облысында азық-түлік бағасын тұрақтандыруға 1 млрд 35 млн теңге бөлінді
«Атырау» әлеуметтік кәсіпкерлік корпорациясы» АҚ мемлекеттік бағдарламаларды іске асыру департаментінің директоры Дмитрий Дюдің мәліметіне сүйенсек, тұрақтандыру қорының қоймасында 216 тонна азық-түлік, 2 379 тонна ауыл шаруашылығы өнімдері бар.
«Әлеуметтік маңызы бар тауарлардың бағасын тұрақтандыру үшін «Атырау» ӘКК» АҚ төрт сауда желісі мен тауар өндірушілерге айналым қаражатын толықтыру үшін 1 млрд 35 млн теңге көлемінде қарыз берді. Бұл қаражаттың қайтарымы болады. Кәсіпкерлер алдында әлеуметтік маңызы бар 19 түрлі азық-түлік тауарының бағасын тұрақтандыру міндеті тұр», -дейді Дмитрий Дю.
Оның айтуына қарағанда, «Лидер» және «Идеал» супермаркеттерінің 39 нүктесінде азық-түліктер нарық бағасынан 33%-ға төмен бағамен сатылып жатыр. Тауарлар күн сайын сауда орындарына жеткізіледі. Тұрақтандыру қоры арқылы жеткзілетін азық-түлік өнімдері супермаркеттер желісінде «Тұрақтандыру қорының тауарлары» деген жазуы бар арнайы сөреге орналастырылған.
«Ауыл шаруашылығы тауарлары Атырау қаласындағы 4 базарда нарық бағасынан 63% төмен бағамен сатылады. Мәселен, бірінші сұрыпты ұннан пісірілген нан бағасы – 80-82 теңге. Ал, сиыр еті (сүйегі бар жауырын-төс бөлігі) – 1853, он жұмыртқа – 360, картоп – 185, пияз – 80, сәбіз – 145, қырыққабат – 125, қызылша бағасы 170 теңге тұрады. Көкөністер «Дина», «Сарайшық», «Насиха» және «Көктем» базарларында сатылымға қойылды», -деп мәлім етті Дмитрий Дю.
Еске сала кетелік, бұған дейін Атырау облысында әлеуметтік маңызы бар азық-түліктің қажетті қоры барын https://kaz.inform.kz/news/atyrau-oblysynda-aleumettik-manyzy-bar-azyk-tuliktin-kazhetti-kory-bar_a3884011 жазған болатынбыз.