Атырау облысында «КамАЗ» шөп тиелген екі тіркемесімен бірге өртенді

АТЫРАУ. ҚазАқпарат –Атырау облысында «КамАЗ» шөп тиелген екі тіркемесімен бірге өртеніп кетті, деп хабарлайды ҚазАқпарат.

Атырау облыстық Төтенше жағдайлар департаменті баспасөз қызметінің мәліметінше, кеше, 18 тамызда сағат 17:30 шамасында жүк көлігі екі тіркемесімен бірге өртке оранған.

«Бұл оқиға Қызылқоға ауданындағы Мұқыр ауылдық округіне қарасты Тасқұдық елді мекенінің тұсында, өрт сөндіру бөлімінен 70 шақырым қашықта болған. Соған қарамастан, өрт сөндірушілер оқиға орнына жетіп, қызыл жалынды сөндіруге кірісті. Өрт салдарынан шөп тиелген екі тіркеме толығымен жанып кетті. Ал, «КамАЗ» көлігі ішнара бүлінді» -деп хабарлады департаменттің баспасөз қызметі.

Еске сала кетелік, бұдан бұрын Атырауда дәмхана түгі қалмай, жанып кеткен еді.