Атырау облысында кәріз суын далаға төккен кәсіпорынға екі рет айыппұл салынды

Атырау облыстық экология департаменті баспасөз қызметінің мәліметінше, «Жылыой су» МКК-ның кәріз суын тазаламай далаға төгіп келген.

«Биыл маусым айында Сыбайлас жемқорлыққа қарсы іс-қимыл агенттігінің Атырау облысы бойынша департаментімен бірге Жылыой ауданында орналасқан «Жылыой су» МКК-ға тексеру жүргізіліп, кәріз суын Құлсары қаласының шеткі аймағына тазалаусыз және рұқсатсыз төккенін анықталды. Осыған байланысты Атырау облысы табиғи ресурстар және табиғат пайдалануды реттеу басқармасынан шара қабылдау туралы хат түсті», -деп хабарлады департаменттің баспасөз қызметі.

Экология департаментінің мамандары «Жылыой су» МКК-ға жоспардан тыс тексеру жүргізді. Тексеру нәтижесі хатта көрсетілген деректерді растады.

«Анықталған заң бұзушылықтарға қатысты ҚР Әкімшілік құқық бұзушылық туралы кодексінің 331-бабы және 328-бабымен әкімшілік құқық бұзушылық туралы хаттамалар толтырылды. Іс құжаттары «Жылыой су» МКК-ның арызы негізінде Жылыой аудандық сотына қарауға жолданды. Соттың 8 тамыздағы қаулысымен «Жылыой су» МКК-ға әкімшілік құқық бұзушылық жасағаны үшін кінәлі деп танылып, 1 380 000 теңге, 1 қыркүйектегі қаулысымен 272 871 871 теңге әкімшілік айыппұл салынды», -деп мәлім етті департаменттің баспасөз қызметінен.

Еске сала кетелік, бұған дейін Теңіз кен орнында ауаға нормадан артық 425 тонна зиянды зат шығарылғанын хабарлаған едік.