Атырау облысында мал бағуға шыққан ер адам жоғалып кетті
Облыстық төтенше жағдайлар департаменті қоғаммен байланыс тобының мәліметінше, ол кеше мал жаюға шыққан. Оның мал жаятын өрісі аудан орталығы – Құлсары қаласынан қай бағытта екені нақтыланбаған.
«Жылыой ауданы тұрғынының 9 мамырда сағат 8:00-де өріске мал айдап шыққаны анықталды. Бірақ, содан бері одан еш хабар болмаған. Осы уақытқа дейін тұратын жеріне қайта оралмаған», - деп хабарлады департаменттің қоғаммен байланыс тобы.
Бір күн бұрын мал жаюға шығып, хабар-ошарсыз кеткен ер адамның жасы 30-да. Әзірге оның жоғалып кетуіне не себеп болғаны белгісіз күйде қалып отыр.
Жоғалған малшыны іздестіру бүгін, 10 мамырда жергілікті уақытпен сағат 11:15-те басталды. Іздестіру жұмыстары Жылыой ауданының аумағындағы жазық далада жүріп жатыр.
Оған облыстық төтенше жағдайлар департаметінен 6 қызметкер, 1 қызметтік ит, туыстарынан 4 адам, ӨКМ-нен 1 қызметкер тартылды. Сондай-ақ, «Қазавиақұтқару» АҚ-ның «Ми-8МТВ UPMI844» тікұшағымен Құлсары қаласынан 150 шақырым радиуста әуеден барлау жүргізу қолға алынды. Тікұшақтың экипаж құрамында 5 адам бар.
Еске сала кетелік, бұған дейін Атырау облысында жоғалып кеткен 11 адам іздестіріліп жатқанын, кейін олар аман-есен табылғанын жазған едік.