Атырау облысында судағы қауіпсіздікті бұзғандарға 741 мың теңге айыппұл салынды

Облыстық төтенше жағдайлар департаментінің қоғаммен байланыс тобынан мәлім еткендей, жыл басынан бері су айдындарында 10 адам қаза тапқан. Оның ішінде 3 бала бар.

«Шомылу маусымы басталған 1 маусымнан бері 3 адам суға батып кетті. Суға батқандардың 2-еуі кәмелетке толмаған бала. Статистикалық дерекке сәйкес судағы жазатайым оқиғалардың 95 пайызы мас күйінде шомылу, суда жүзу қабілетін асыра бағалау салдарынан болып отыр. Ал, балалар ата-ананың қарауынсыз суға шомылудан оқыс оқиғаның құрбаны болады. Кейбір адамдар денсаулығының күрт нашарлауы мен құрысудан суға батып кетеді», -деп хабарлады департаменттің қоғаммен байланыс тобы.

Қазір суда жазатайым оқиғаларды болдырмау үшін төтенше жағдайлар департаментінің, полиция қызметкерлерінің, Атырау қаласы мен аудандар әкімдіктерінің өкілдері күнделікті үгіт-насихат жұмыстарын жалғастырып отыр. Оғанн Ұлттық ұланның күштері мен 4 еріктілер ұйымы тартылған. Азаматтық қорғау органдарының қызметкерлері су айдындарында қауіпсіздік қағидаларын түсіндіреді. Негізгі қорғау құралдарын, сондай-ақ зардап шеккендерге алғашқы дәрігерлік көмек беру тәсілдерін көрсетеді.

«Су айдындарында шомылу кезінде төтенше жағдайлардың алдын алу мақсатындағы күнделікті рейдтік іс-шараларға 273-тен астам адам мен 44 техника жұмылдырылып отыр. Атырау қаласындағы, Жылыой және Құрманғазы ауданындағы үш суда құтқару стансасында жедел-құтқару жасағының қызметкерлері тәулік бойы кезекшілікті жүзеге асырып отыр. Мақсат – азаматтардың судағы қауіпсіздік талаптарын бұзуына жол бермеу. Соған қарамастан ҚР Әкімшілік құқық бұзушылық туралы кодекстің 364-бабының 1 және 2-бөлігін, 440-бабының талабын бұзушыларға 82 хаттама толтырылып, 741 мың 286 теңгеге айыппұл салынды», -деп мәлім етті қоғаммен байланыс тобынан.

Еске сала кетелік, бұған дейін Атырау облысында жыл басынан бері 10 адам суға кеткенін хабарлаған едік.