Атырау облысында Тәуелсіздік мерекесі күндері 56 сәби өмірге келді
АТЫРАУ. ҚазАқпарат – Атырау облысында Тәуелсіздіктің 30 жылдық мерекесі күндері 56 сәби өмірге келді, деп хабарлайды ҚазАқпарат.
Атырау қалалық әкімдігінің баспасөз қызметінен мәлім еткендей, 16-17 желтоқсанда дүние есігін ашқан шақалақтардың арасында 28 ұл мен 28 қыз бар.
«Ел Тәуелсіздігіне 30 жыл толған мереке күні – 16 желтоқсанда 37 нәресте өмірге келді. Жас босанған аналарға мерекелік көңіл-күй сыйлау үшін Атырау қалалық Жұмыспен қамту, әлеуметтік бағдарламалар және азаматтық хал актілерін тіркеу бөлімі, «Азаматтарға арналған үкімет» мемлекеттік корпорациясы» КеАҚ-ның Атырау облысы бойынша филиалы, облыстық Денсаулық сақтау басқармасы мен «Қазпошта» АҚ-ның облыстық филиалы шақалақтардың тууы туралы куәлігін жедел рәсімдеді», - деп хабарлады әкімдіктің баспасөз қызметінен.
Тәуелсіздік күнінде өмірге нәресте әкелген жас ананың бірі – Айғаным. Махамбет ауданында түратын отбасы перзентіне Фатима есімін таңдаған.
«Біз үшін ұлық мерекеде сәбилі болу – үлкен бақыт. Енді әкесінің ерке қызы – Фатимамыз бар»,- дейді ана.
Ата-анасын зор қуанышқа бөлеген нәрестелерге Әміре, Айдай, Айшын, Нұрислам, Нұрсейіт сынды есімдер көбірек қойылған.
Еске салайық, 16-17 желтоқсан – Тәуелсіздік мерекесі күндері дүниеге келген сәбилерге baby-бокстар сыйға тартылып жатыр.
Тәуелсіздіктің 30 жылдық мерейтойына орай берілген «Сүйінші» сыйқорабына бөбектерге қажетті заттардан басқа, ҚР Президенті Қасым-Жомарт Тоқаевтың құттықтау тілегі жазылған ашық хат, «Тәуелсіз Қазақстанға 30 жыл» монетасы және баланың тууы туралы куәлігі салынған. Ерекше жиынтық қорап ел бойынша барлығы 2 мың баланың ата-анасына тапсырылды.
