Атырау облысында жалпы саны 19 адам зардап шеккен тамақтан улану жағдайы тіркелді
АСТАНА. Маусымның 1-і. ҚазАқпарат /Ернұр Ақанбай/ -Мамырдың 30-31- і аралығында Атырау облысында жалпы саны 19 адам зардап шеккен тұрмыстық тамақтан улану жағдайы тіркелді.
Бұл туралы ҚазАқпарат Денсаулық сақтау министрлігінің Мемлекеттік санитарлық-эпидемиологиялық қадағалау комитетіне сілтеме жасап хабарлайды.
«Улануды мамандар Қызылқоға ауданының Миялы ауылындағы астан қалған етті пайдаланумен байланыстырады.
Ағымдағы жылғы маусымның 1-де зардап шеккен 9 адам Атырау қаласының инфекциялық ауруханасына жатқызылды, сондай-ақ тексеру мен сұрау арқылы белсенді іс-шаралар жүргізу кезінде анықталған 10 науқас Қызылқоға аудандық ауруханасына жатқызылды. Науқастардың жағдайы жеңіл және орташа ауыр дәрежесінде, барлық зардап шеккендер қажетті медициналық көмек алуда.Санитариялық қызметтің мамандары ошақта эпидемияға қарсы іс-шаралар жүргізуде», делінген ҚР Денсаулық сақтау министрлігі баспасөз қызметінің бүгінгі таратылған хабарламасында.
