Атырау облысында жемқорлықпен күрес бағытында марафон ұйымдастырылды
АСТАНА. ҚазАқпарат - Атырау облысында сыбайлас жемқорлықпен күреске бағытталған «Адал жол» марафоны өтті, деп хабарлайды ҚазАқпарат Атырау облысы әкімдігінің баспасөз қызметіне сілтеме жасап.
Шараны Атырау облысы Жылыой ауданы әкімі аппараты жəне ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Атырау облысы бойынша департаментімен бірлесіп орталық алаңда ұйымдастырды.
Шараға «Нұр Отан» партиясының орталық аппаратының партиялық бақылау департаментінің басшысы Нұрлан Баймұрзаев, Арнайы мониторингтік топ жетекшісі, қоғам қайраткері Айгүл Соловьева, Республикаға танымал дизайнер, ҚР Президентінің «Алтын сапа» сыйлығының лауреаты Ырза Тұрсынзада, ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің өкілдері Равиль Тюлебаев, Арман Бердалин, Айбол Қозбағаров жəне Атырау облысы бойынша департамент басшысы Тоқтамыс Қадошұлы мен БАҚ өкілдері қатысты.
Іс-шара барысында орталық алаңда аудандық жастардың «Жемқорлыққа жол жоқ» флешмобы өткізіліп, Жылыой ауданы сыбайлас жемқорлыққа қарсы «Адал жол» марафон-эстафетасының туын Индер ауданына табыстаған болатын.
Арнайы мониторингтік топ құрамы осы жылы ашылып өз өнімін беріп үлгерген «Жылыжай кешеніне» барып жұмысымен танысып, соңғы үлгідегі заманауи технологиямен өнім алып отырған кешен жұмысына оң бағасын берді.
Сонымен қатар мониторингтік топ мүшелері «Аудандық жұмыспен қамту орталығының» жұмыс барысымен танысты. Жұмыспен қамту орталығы директоры Қ. Омаровтың мəліметінше, жаңа ғимаратқа замануи терминал қойылып жұртшылыққа сапалы қызмет көрсетілуде. Жыл басынан бері орталықта тіркеудегі 607 тұрғын жұмыспен қамтылған. Сондай-ақ еңбекпен қамту шаралары, қоғамдық жұмыстарды ұйымдастыру, жастар тəжірибесіне жолдау, кəсіптік оқыту бағдарламаларын ұсынатынын айтты.
Аудандық «Кең Жылыой» мəдениет үйінде өткен аудан активтерімен жиын кезінде аудан əкімі Əлимұхаммед Құттымұратұлы ауданның əлеуметтік экономикалық даму көрсеткішін баяндай келе Қазақстан Республикасының 2015-2025 жылдарға арналған сыбайлас жемқорлыққа қарсы стратегиянының басты бағыты сыбайлас жемқорлыққа қарсы мəдениет деңгейін қалыптастыру бойынша нақты кешенді іс-шаралардың аудан көлемінде əлі жалғасын табатынын атап өтті.
