Атырауда 70 көлік жүргізушісі 1 млн 743 мың теңгенің айыппұлын төлемеген
Атырау қалалық полиция басқармасы жедел басқару орталығының қызметкерлері «Іnterceptor» іздеу жүйесі арқылы айыппұлын төлемей жүрген 70 көлік жүргізушісін
анықтаған.
«Ұсталған көлік жүргізушілерінің төленбеген айыппұлы 1 млн 743 мың теңгені құрап отыр. Оның ішінде 52 көлік Ресей Федерациясында тіркелген. Армения Республикасында тіркеуде тұрған 9 көлік бар. Ал, бір көлік Қырғыз Республикасының есебіне алынған.
Атырау қаласындағы М.Баймұханов көшесінде тоқтатылған «Audi A4» маркалы автокөлігінің жүргізушісінде төленбеген 8 айыппұлы бары анықталды. Оның мөлшері – 119 мың 170 теңге. Айыппұлы төленбеген 70 көлік арнайы айып тұрағына қойылды», - деп хабарлады департаменттің баспасөз қызметі.
Еске сала кетелік, бұған дейін Атырауда 14 жастағы жасөспірім қызды көлік қағып кеткен болатын.