Атырауда әскерилер 50 литр қан тапсырды
АТЫРАУ. ҚазАқпарат –Атырауда «Батыс» өңірлік қозбасшылығының әскери қызметкерлері 50 литрге жуық қан тапсырды, хабарлайды ҚазАқпарат.
«Батыс» өңірлік қолбасшылығы баспасөз қызметінің хабарлауынша, жергілікті ауруханалардағы ауыр науқастар үшін қан тапсыруға 100-ден астам әскери қызметкер келді. Олардың басым бөлігі алғаш рет донорлық қан тапсыруға қадам жасады.
«Процедурадан бұрын әр донор қан тобын анықтау үшін алдын-ала зертханалық тексеруден өтті. Сауалнамалар мен дерек құжаттарын толтырып, дәрігерлермен әңгімелесті. Донорлық қан апаттардан зардап шеккендерге, қаладағы ауруханаларда жатқан науқастарға шұғыл медициналық көмек көрсету үшін пайдаланылады» -дейді «Батыс» өңірлік қолбасшылығының медициналық қызмет офицері, майор Аброр Исаходжаев.
«Батыс» өңірлік қолбасшылығының баспасөз хатшысы Рүстем Игісіновтің айтуынша, әскери қызметкерлердің бір мезгілде тапсырған қаны 50 литрге жуықтады.
