Атырауда автобус жүргізушілері бір күнде 55 мәрте ереже бұзған
АТЫРАУ. ҚазАқпарат – Атырауда автобус жүргізушілері бір күнде 55 мәрте ереже бұзған. Ал, екеуі рульге арақ ішкен күйде отырған, деп хабарлайды ҚазАқпарат.
Облыстық полиция департаменті баспасөз қызметінің мәліметінше, кеше, 4 қазанда «Автобус» жедел алдын алу іс-шарасы басталған. Мақсат – жолаушылар көлігі жүргізушілері тарапынан жол қозғалысы ережелерін бұзудың алдын алу.
«Полиция қызметкерлері іс-шараның алғашқы күнінде автобус жүргізушілерінің жолда жүру ережесін 55 мәрте бұзғанын анықтады. Оның ішінде жолаушыларды, багажды және жүктерді тасымалдау қағидаларын бұзудың – 4, тиісті рұқсатсыз қайта жабдықтау – 3, техникалық байқаудан өтпеген – 17, рульде телефонды немесе радиостанцияны пайдалану – 15, жылдамдықты арттыру – 7, маневр жасау ережелерін бұзу – 11, ҚР міндетті сақтандыру туралы заңнамасын бұзудың 5 дерегі бар. Жолаушы тасымалдайтын 4 автобус айып тұрағына қойылды. Кінәлі жүргізушілерге айыппұл салынды» -деп хабарлады департаменттің баспасөз қызметі.
Сондай-ақ, автобус рульіне ішімдік ішкен күйде отырған екі жүргізуші ұсталған.
«Мәселен, 4 қазанда таңғы сағат 07:40 шамасында «Ақтобе-Атырау-РФ шекарасы» бағытындағы тас жолда қоғамдық көлік тоқтатылды. Тексеру кезінде 1979 жылғы жүргізушінің ішімдік ішкені белгілі болды. Ал, сағат 08:52-де дәл осы бағыттағы жолдың 577-шақырымында автобус көлігін алкогольдік ішімдік ішкен күйінде басқарған тағы бір жүргізуші ұсталды. Екі жүргізушіге қатысты ҚР Әкімшілік құқықбұзушылық туралы Кодексінің 608-бабымен әкімшілік хаттамалар толтырылды» -деп мәлім етті баспасөз қызметінен.
Еске сала кетелік, бұдан бұрын Атырауда автобус жүргізушілері бір күнде 170 рет ереже бұзғанын хабарлаған едік.
