Атырауда балабақшаларды ашады
АТЫРАУ. ҚазАқпарат – Атырауда мектепке дейінгі балалар мекемелері ашылып, азық-түлік емес тауарлар сататын дүкендер жұмысын бастайды, деп хабарлайды ҚазАқпарат.
Атырау облысының бас санитарлық дәрігері Темірбек Мұсағалиевтің қаулысына сәйкес, 18 мамырдан бастап мектепке дейінгі балалар мекемелері, жазылу арқылы 5 адамнан аспайтын репетиторлық, тілдік және өзге де үйірмелердің жұмыс істеуіне рұқсат беріліп отыр. Сондай-ақ, ауданы 2 мың шаршы метрден аспайтын азық-түлік емес тауарлар сататын дүкендер де ашылады.
Аталған кәсіпкерлік нысандарының барлығы таңертеңгі сағат 10:00-ден кешкі 18:00-ге дейін жұмыс істейтін болады.
Ал, 20 мамырдан бастап меншік нысанына қарамастан барлық балабақшаларда кезекші топтарды ұйымдастыруға рұқсат берілді. Балабақшаларға балаларды әкелу үшін ата-анасының екеуі де, немесе қамқоршылары мен асырап алушылар жұмыс істейтіні туралы анықтаманы көрсетуі тиіс.
